A Xunta de Goberno do Colexio Profesional de Xornalistas de Galicia convoca a XXIII Asemblea Xeral Ordinaria do CPXG, que se celebrará o sábado 2 de marzo de 2024, ás 11.00 horas en primeira e ás 11.30 horas en segunda convocatoria. Pódese participar na Asemblea tanto de maneira presencial na sede do Colexio en Santiago de Compostela (Rúa Ponferrada, 9, baixo) como de forma telemática, sendo imprescindíbel en calquera caso confirmar a asistencia antes do 26 de febreiro.

O Colexio Profesional de Xornalistas de Galicia xa ten dispoñibeis na súa plataforma de formación un total de doce cursos online, encabezados polo programa orientado a fomentar a promoción económica e laboral dos e das xornalistas de Galicia, subvencionado pola Deputación da Coruña e aberto de balde a todas as persoas interesadas. Outros webinars tratan temas como o discurso de odio, a violencia contra as mulleres, a información xudicial ou o xornalismo de datos.

O texto definitivo da futura Lei Europea de Liberdade de Medios, aprobado recentemente pola Comisión de Cultura e Educación do Parlamento Europeo, recolle a promoción de certificacións para identificar os contidos realmente informativos na Internet, entre os que cita especificamente a Journalism Trust Initiative de Reporteiros Sen Fronteiras. O Colexio de Xornalistas ten en marcha a súa propia certificación para os medios dixitais galegos co Selo NRede.

O Colexio Profesional de Xornalistas de Galicia e o Club de Prensa de Ferrol, coa colaboración do Concello de Ferrol, abren a convocatoria da XX edición do Premio José Couso de Liberdade de Prensa. Pódense presentar candidaturas ao galardón desde hoxe ata o luns 26 de febreiro ás 14:00 horas.

O grupo de investigación Novos Medios da Universidade de Santiago de Compostela, coa colaboración do Colexio Profesional de Xornalistas de Galicia, organiza o seminario online A comunicación na era da intelixencia artificial, que se desenvolverá o vindeiro venres 2 de febreiro, en horario das 12.00 ás 14.00 horas. A asistencia está aberta de maneira gratuíta, mediante inscrición previa, para profesionais da comunicación. 

A escolla dos medios para informarse está fortemente marcada pola preferencia política, segundo unha análise de Digimedios a partir dos datos do CIS. Esta polarización das audiencias daríase de igual maneira na prensa, na radio e na televisión, independentemente de que se trate de medios públicos ou privados. Con todo, os medios de ámbito inferior ao estatal teñen unha repartición de audiencias moito menos polarizada. 

NRede, o rexistro posto en marcha polo Colexio de Xornalistas para garantir o traballo xornalístico das cabeceiras dixitais e facilitar o seu recoñecemento, chega xa aos dezaoito medios acreditados. Coas novas incorporacións de Ecos da Comarca, Ferrol360 e O Tinteiro xa están representadas todas as provincias e cidades galegas, ademais de distintas vilas. Os medios interesados seguen a poden solicitar a súa inscrición, gratuíta para colexiados e colexiadas. 

Tras o asasinato dos xornalistas Hamza Al-Dahdouh e Mustafa Abu Thurayya nun ataque israelí, a Oficina do Alto Comisionado das Nacións Unidas para os Dereitos Humanos e o Secretario Xeral da ONU coincidiron en expresar a súa preocupación pola situación das e dos comunicadores en Gaza. Desde o comezo do conflito o pasado 7 de outubro, entre 72 e 79 xornalistas palestinos atoparon a morte na faixa ocupada.  

O Consorcio da Zona Franca de Vigo abriu unha convocatoria para a provisión dunha praza de persoal laboral fixo de técnico ou técnica de comunicación para adscribir ao posto de Xefe ou Xefa da Unidade de Comunicación, polo sistema de concurso-oposición libre.

O Colexio Profesional de Xornalistas de Galicia vén de sumar ás súas vías de comunicación coas colexiadas e colexiados e con toda a profesión e a sociedade galega unha conta informativa en Threads. Deste xeito, desde esta nova rede social poderá seguirse tamén toda a actualidade relativa á actividade do órgano de representación das e dos xornalistas galegos.