O Colexio Profesional de Xornalistas de Galicia convoca un ano máis, en colaboración con Gadis, o premio 'Somos Esenciais'. Nesta quinta edición, a organización eleva a dotación do premio até os 2.000 euros. Co lema A información ao servizo da xente, este galardón reforza a súa mensaxe cun seminario de xornalismo social que terá lugar a finais de ano. O prazo de presentación de propostas estará aberto ata as 14.00 horas do venres 30 de maio de 2025.

Onte, luns 17 de marzo, rematou o prazo para presentar candidaturas para as demarcacións de Pontevedra, Santiago e Vigo no Pleno Territorial do Colexio Profesional de Xornalistas de Galicia.

A decana do Colexio Profesional de Xornalistas de Galicia, Belén Regueira, e a deputada da Área de Dereitos Civís da Deputación da Coruña, Soledad Agra, presentaron hoxe o programa de obradoiros contra a desinformación con motivo da celebración do segundo dos talleres, impartido por Pedro Costa no IES Maximino Romero de Lema de Baio (Zas). Os obradoiros contra a desinformación son unha iniciativa de alfabetización mediática do Colexio de Xornalistas que continuará até o mes de maio nos centros de ensino medio da Coruña grazas a un convenio asinado coa Deputación da Coruña, a través da área de Dereitos Civís.

O vindeiro luns, 17 de marzo, remata o prazo para presentar candidaturas ás eleccións a representantes das demarcacións de  Pontevedra, Santiago e Vigo no Pleno Territorial. O martes 18 de marzo faranse públicas na web oficial do Colexio as candidaturas recibidas.

Catro candidaturas concorren ao XXI Premio Xornalistas de Liberdade de Prensa, convocado polo Colexio Profesional de Xornalistas de Galicia. A plataforma cívica Acción contra el odio, a xornalista afgá Khadija Amin, o xornal israelí Haaretz e o Sindicato de Xornalistas Palestinos optan neste 2025 ao galardón que recoñece aquelas persoas ou organizacións que destaquen pola defensa da liberdade de prensa ou sexan, ou foran, perseguida polo exercicio do xornalismo e por protexer o dereito a informar e a recibir información.

Os obradoiros contra a desinformación do Colexio Profesional de Xornalistas de Galicia comezaron a súa andaina esta mañá no IES Maximino Romero de Lema de Baio (Zas), cun taller para o alumnado de 4º da ESO, impartido polo xornalista Miguel Rodríguez Fernández ás 8:45. Este programa de alfabetización mediática chega aos centros de ensino medio da Coruña grazas a un convenio asinado coa Deputación da Coruña, a través da área de Dereitos Civís que lidera a deputada, Soledad Agra.

A Corporación Radio e Televisión de Galicia (CRTVG) convoca unha proba para ampliar en tres persoas a listaxe de contratación temporal na categoría de locutor ou locutora de radio.

O grupo de investigación Novos Medios, da Facultade de Ciencias da Comunicación da Universidade de Santiago de Compostela, coa colaboración do Colexio Profesional de Xornalistas de Galicia, organiza o taller gratuíto Técnicas de investigación xornalística en tempos de IA, impartido por Manuel Rico. A xornada terá lugar o martes 1 de abril, en horario das 17.00 ás 20.00 horas na Sala de Doutoramento da Facultade de Ciencias da Comunicación, con prazas limitadas.

Ás 14:00 horas do vindeiro xoves 6 de marzo remata o prazo para enviar candidaturas ao XXI Premio Xornalistas. Convocado polo CPXG, este galardón recolle o legado do Premio Couso co obxectivo de recoñecer o traballo dunha persoa ou organización destacada na defensa da liberdade de prensa ou cunha traxectoria profesional libre e independente. 

O Concello da Pobra do Brollón abre a convocatoria do proceso selectivo, mediante o sistema de oposición libre, dun responsábel de comunicación, por un período de nove meses a media xornada.