Os e as xornalistas vivimos por e para a información como servicio público, e isto é algo que non podiamos pasar por alto na nosa relación cotiá cos membros desta comunidade de xornalistas que é o Colexio Profesional de Xornalistas de Galicia.

Van máis de duas décadas dende que a primeira Xunta de Goberno desta institución, que daquela encabezaba Xosé María García Palmeiro, considerou a idea de abrir unha primeira canle na que plasmar, de xeito sinxelo e práctico, o máis fundamental da actividade institucional desenvolvida ao longo da semana polo Colexio, xunto con outros apuntamentos de interese como certames, convocatorias ou ofertas de emprego.

Pasaron máis de vinte anos e o boletín F5 non é (nin dende aquel ano 2002 nin tampouco dende o momento de creación do Colexio) a única canle de comunicación cos colexiados e colexiadas, mais si continúa a ser un recordatorio, ao remate de cada semana, de que formamos parte dunha organización activa e dinámica.

Mil números do Boletín de Comunicación de Galicia ben merecen esta modesta celebración por escrito, co ánimo de seguir a encher de contidos esta canle de comunicación. Porque iso será a mellor demostración de que o Colexio Profesional de Xornalistas de Galicia segue a ser unha entidade viva.

Francisco X. González Sarria
Decano do Colexio Profesional de Xornalistas de Galicia