Ante a crecente saída de espazos en internet susceptibles de seren ou non considerados medios de comunicación, o Colexio Profesional de Xornalistas de Galicia quere pór en marcha unha ferramenta que poida valer de referencia á cidadanía para poder distinguir entre o que é un espazo informativo e o que non o é. Igualmente, pretende darlle visibilidade a estes medios de cara a facilitarlles a súa identificación a efectos de acreditacións para determinados eventos ou acceso a subvencións públicas.

O CPXG traballará cos medios que formen parte deste rexistro para establecer un grupo de traballo que favoreza a súa posta en valor, así como apoiar o traballo que realizan neles os profesionais da información.

Ademais, entre as primeiras medidas, o Colexio de Xornalistas solicitaralle á Xunta de Galicia a inclusión dos medios que sexan recoñecidos co selo de Medio Dixital Galego na Guía da Comunicación que edita a administración autonómica. E, en calquera caso, o CPXG manterá na súa propia páxina web actualizado un rexistro cos medios que formen parte desta rede.

A solicitude de inscrición é voluntaria, pero supón unha referencia de garantía de información para a cidadanía. A aprobación da alta no rexistro vén precedida por un exame exhaustivo da páxina web, que ten que cumprir cos criterios e requisitos que se establecen nos seguintes apartados.

O ámbito de actuación será a comunidade autónoma de Galicia.

O Rexistro de Medios Dixitais Galegos creouse por acordo en reunión ordinaria da Xunta de Goberno do Colexio Profesional de Xornalistas de Galicia. Nesa reunión quedou constituída unha Comisión do Rexistro e un equipo de coordinación do proxecto.

O obxecto principal deste rexistro é avaliar os medios de comunicación dixitais e recoñecer o seu valor xornalístico.

Ao respecto dos requisitos que se deben cumprir, serán os seguintes:

1. O medio debe estar constituído como empresa xornalística ou entidade legalmente rexistrada en calquera das súas figuras, ou ben o seu/s autor/es ou autora/s estaren dados de alta como autónomos/as.
2. A empresa, entidade ou titular do medio debe estar ao corrente das súas obrigas con Facenda e Seguridade Social.
3. No persoal ou na organización debe haber, polo menos, unha persoa licenciada ou graduada en Xornalismo ou ben colexiada no Colexio Profesional de Xornalistas de Galicia. Esta persoa debe realizar labores de redacción, selección e xerarquización dos contidos de forma profesional. Estas tarefas terán que ser desenvoltas por profesionais por conta allea ou propia. Non se terá en conta para tal fin, as persoas que estean no medio a través de calquera tipo de bolsa.
4. Os medios inscritos no Rexistro de Medios Dixitais Galegos deben ser medios que se desenvolvan principalmente na contorna dixital e cubran información de interese xeral sobre a comunidade autónoma, algún dos seus municipios ou territorios, ou ben información especializada sobre algún dos seus aspectos mediante a produción propia de contidos. Esa produción propia será a que determine a cobertura ou ámbito de especialización do medio: local, provincial, rexional, deportivo... A produción de contidos será propia e non só baleirado de notas.
5. O medio debe ser actualizado de forma periódica (diaria, semanal, quincenal, mensual...) en forma e modo similar ao dos medios de comunicación convencionais.
6. Para obter o selo do CPXG e a súa inclusión no Rexistro de Medios Dixitais Galegos o medio deberá ter, polo menos, 6 (seis) meses de traxectoria demostrable. En caso de anuarios, esta experiencia amplíase a 3 (tres) anos.
7. Como medio xornalístico dixital, o medio deberá respectar as normas éticas deontolóxicas que rexen a profesión xornalística. Queda excluído calquera medio que teña publicidade sexista, fins puramente comerciais ou que sexa un agregador de noticias. O contido publicitario nos medios que formen parte de NRede non poderá ser nunca superior ao 50% e deberá estar claramente identificado.De non cumprir estas premisas, o Colexio de Xornalistas poderá actuar de acordo co seu Código Deontolóxico.
8. O idioma do medio pode ser o galego, español ou ambos.