A Federación Internacional de Xornalistas aproveita o Día Internacional para Pór Fin á Impunidade dos Crimes contra os Xornalistas para pedir apoios á súa proposta de convención internacional nas Nacións Unidas sobre a seguridade de xornalistas e outros e outras profesionais dos medios. O proxecto contempla distintas obrigas para que os estados fagan fronte á impunidade da violencia contra informadores e a creación dun Comité para a Seguranza dos Xornalistas.  

Este martes entraba en vigor a polémica nova Lei contra a desinformación turca, que establece penas de cárcere de até tres anos por difundir o que se considere como información falsa. A norma, considerada pola súa indefinición e alto alcance como "un dos maiores mecanismos de censura e autocensura" da historia de Turquía, provocou as críticas da oposición, a OSCE, o Parlamento Europeo ou as Nacións Unidas, así como o rexeitamento practicamente unánime das asociacións de xornalistas tanto locais como internacionais. 

A publicación dalgunhas das condicións para as acreditacións xornalísticas no Mundial de Fútbol de Qatar, que inclúen a prohibición de captar fotografías ou imaxe de vídeo en numerosas localizacións, volveron levantar as queixas sobre a liberdade de información no país que acolle este evento internacional. A Federación Internacional de Xornalistas instou ao goberno qatarí a abandonar "estes termos e condicións abusivas". 

A Sala do Civil do Tribunal Supremo rexeitou o último recurso contra unha reportaxe emitida en La Sexta, que informaba da conta en Suíza dunha executiva da empresa farmacéutica comercializadora da medicación contra a hepatite C. A peza, baseada na lista de evasores fiscais coñecida como "lista Falciani", é considerada como veraz e de interese xeral por parte do alto tribunal. 

Un informe do secretario xeral da ONU recolle en 42 países "tendencias preocupantes" de intimidación ás persoas que colaboran coa organización facilitando información en materia de dereitos humanos, fundamentalmente vítimas, activistas e xornalistas. O relatorio destaca episodios repetidos no tempo de vixilancia, lexislación restritiva e autocensura.

O Consello Europeo deu este martes o visto e prace á Lei de Servizos Dixitais, o último paso preciso para a aprobación da nova normativa europea que regulará os contidos das plataformas dixitais. A lei, que entrará en vigor no 2024, obriga ás empresas de servizos dixitais, especialmente a aquelas con máis de 45 millóns de usuarios na UE, a eliminar contidos ilegais, introducir estratexias para frear as campañas de desinformación e render contas sobre os algoritmos e modelos de negocio.

A Fundación Luzes organiza as xornadas Tecendo xornalismo, baixo a dirección de Manuel Rivas e Xosé Manuel Pereiro, coa participación de destacados periodistas de Galicia, España, Portugal e Italia, para debater sobre o xornalismo crítico e de servizo público nun ambiente profesional e cun público restrinxido, os próximos 7 e 8 de outubro, no Pazo Mariñán da Coruña. As colexiadas e colexiados teñen acceso libre ás sesións previa reserva de praza.

Desde o luns 3 de outubro, o Colexio de Xornalistas regresa ao horario de inverno, segundo estipula o convenio de Despachos e Oficinas da provincia de A Coruña. A partir de agora, o CPXG estará aberto de 9.00 a 14.00 e de 16.00 a 19.00 horas de luns a xoves e de 08.00 a 15.00 horas os venres.

O Colegio de Periodistas de Castilla y León e a Universidad de Salamanca organizan o curso on-line Xornalismo e redes sociais: Ferramentas de análise e verificación, que se desenvolverá online do luns 24 de outubro ao domingo 4 de decembro do 2022. O curso ten matrícula a prezo reducido para colexiados e colexiadas do CPXG.

Věra Jourová, vicepresidenta da Comisión Europea vén de presentar a proposta de Lei Europea de Liberdade de Medios. A norma propón medidas para protexer a independencia editorial, prohibir a espionaxe a xornalistas, garantir a independencia e o mantemento dos medios públicos, supervisar a concentración mediática, regular a publicidade institucional ou protexer o contido online, ademais da creación dun órgano regulador europeo en materia de comunicación. A súa ratificación e entrada en vigor está prevista para antes das eleccións europeas de 2024.