O xornalista e escritor Manuel de Lorenzo foi o convidado este martes de Aprendamos a ler a información, o programa organizado polo Colexio Profesional de Xornalistas de Galicia e patrocinado pola Fundación "la Caixa", que pretende ser unha ferramenta de apoio á reinserción da poboación reclusa feminina do centro penitenciario de Pereiro de Aguiar a través de diálogos sobre a actualidade e a súa cobertura nos medios de comunicación. 

Os Premios Manuel Beiras de recoñecemento ao uso do galego no ámbito empresarial, en cuxo xurado participa o Colexio Profesional de Xornalistas de Galicia, entregáronse este luns 21 de decembro no Teatro Principal de Santiago de Compostela. A libraría especializada en banda deseñada Kómic, a consultora Abeluria Sociedade Cooperativa Galega e o restaurante e tenda de ultramarinos Orixe foron os galardoados nesta XXIII edición. 

Javier Fraiz inaugurou este mércores no centro penitenciario de Pereiro de Aguiar o programa Aprendamos a ler a información, organizado polo Colexio Profesional de Xornalistas de Galicia e patrocinado pola Fundación "la Caixa", que pretende ser unha ferramenta de apoio á reinserción da poboación reclusa feminina a través de diálogos con xornalistas e escritores sobre a actualidade e a súa cobertura nos medios de comunicación. 

A cadea qatarí Al Jazeera vén de presentar no Tribunal Penal Internacional "novas probas" sobre o asasinato da xornalista palestino-estadounidense Shireen Abu Akleh, acontecido o pasado 11 de maio. Segundo a canle, as evidencias apuntarían a unha intervención directa do exército israelí. O goberno israelí ten admitido a "probábel" implicación na morte da informadora, pero negouse a participar na investigación aberta polos Estados Unidos ou a impulsar unha propia. 

O vindeiro mércores 14 de decembro terá lugar no Teatro Principal de Santiago de Compostela (Rúa Nova, 21) o IV Encontro de Xornalismo Iberoamericano, organizado por eldiario.es co patrocinio de Abanca e Iberia, a colaboración do Media Development Investment Fund e o apoio da Deputación da Coruña e o Concello de Santiago. A xornada, na que participarán destacados xornalistas iberoamericanos, desenvolverase entre as 16:00 e as 20:30 horas, e a inscrición é gratuíta.

Reporteiros Sen Fronteiras recupera os casos de demandas abusivas por revelación de segredos en España, algo que denuncian como "especialmente frecuente". Desde a organización internacional reclámase unha lexislación que protexa os xornalistas destas acusacións e castigue os intentos de criminalizar os medios.

A Federación Internacional de Xornalistas fai de novo un chamamento ás autoridades qatarís para que respecten a liberdade de prensa e non obstrúan o traballo das e dos xornalistas que están a cubrir o Mundial masculino de fútbol. O organismo internacional recolle unha serie de incidentes que demostran os atrancos reiterados á libre información no país.  

O informe Mujeres Periodistas y Salas de Redacción: avances, desafíos y recomendaciones para prevenir la violencia y luchar contra la discriminación, realizado pola Relatoría Especial para a Liberdade de Expresión da Comisión Interamericana de Dereitos Humanos debuxa unha situación laboral das mulleres xornalistas americanas marcada pola discriminación e as violencias de xénero nas redaccións. O documento propón a creación de organismos e estratexias específicas nos medios de comunicación para avanzar na prevención das agresións e na consecución da igualdade.

O Colexio Profesional de Xornalistas de Galicia organiza o webinar "Que información oficial teñen a obriga de me dar os xulgados e tribunais?", impartido por María Pardo, xefa do Gabinete de Comunicación e Protocolo do Tribunal Superior de Xustiza de Galicia, que terá lugar o vindeiro sábado 26 de novembro entre as 11.00 e as 13:00 horas, a través da plataforma de formación online do CPXG. 

O Colexio Profesional de Xornalistas de Galicia celebrou onte a mesa redonda O tratamento informativo do Prestige vinte anos despois, no Centro Internacional de Prensa de Galicia en Santiago de Compostela. No debate, Rocío Castro, Pablo González, Selina Otero, Aida Pena e Xosé Manuel Pereiro, baixo a moderación de Ana González Liste, destacaron o fito que significou a cobertura da catástrofe para a nosa profesión, e debullaron unha situación que se moveu entre a oportunidade duns medios e xornalistas galegos convertidos en referentes para a poboación e a crise que significou o apagamento informativo por parte da administración.