1.- A súa máis enérxica condena ós empurróns, insultos e ameazas que os fotoxornalistas denuncian ter sufrido por parte de membros da organización que se encargaron das tarefas de seguridade durante a celebración da asemblea. Un deles mesmo presentou denuncia ante a Policía Nacional por unha presunta agresión por parte dun dos membros dos equipos de seguridade.

2.- A súa repulsa aos constantes atrancos que os fotoxornalistas sufriron no desenvolvemento do seu labor informativo, en especial cando trataban de recoller as imaxes que mostraban a tensión e os enfrontamentos verbais que se rexistraron durante a Xunta Xeral de Accionistas.

3.- O seu rexeitamento ao feito de que se impedise a entrada de xornalistas dun medio en concreto, La Voz de Galicia, a espazos aos que si puideron acceder ao resto de profesionais, ao entender que se trata dunha represalia polas súas informacións inadmisible en democracia.

Por último, o CPXG insta ao Real Clube Deportivo da Coruña a desistir deste tipo de actitudes que supoñen un grave atentado contra o dereito dos cidadáns a recibiren unha información libre e plural.

Santiago de Compostela, 28 de decembro de 2006.

Xunta de Goberno
Colexio Profesional de Xornalistas de Galicia