Dúas novas agresións sexistas mostran de novo as dificultades que enfrontan as traballadoras dos medios
Os ataques sexistas sufridos nos últimos días por dúas traballadoras de televisión nos entroidos de Lantz (Navarra) e Colonia (Alemaña) volven pór o foco sobre unha violencia que sofre boa parte das mulleres xornalistas. Estas agresións son consecuencia das desigualdades de xénero e a ideoloxía patriarcal imperante na nosa sociedade, incompatíbel co libre exercicio da profesión xornalística.
A EiTB denunciaba este luns o ataque sexista sufrido por unha das súas traballadoras no entroido de Lantz (Navarra). A propia operadora de cámara, da empresa Fase 3, que cubría para a canle pública vasca o evento, relataba nunha nota en Facebook a agresión por parte de tres individuos completamente tapados. Apenas tres días antes, o venres, Esmeralda Labye, reporteira belga de Haberler, víase nunha situación similar no carnaval de Colonia, en Alemaña.
Lonxe de seren casos illados, estas dúas noticias son unha mostra da dura realidade á que se teñen que enfrontar as traballadoras dos medios. Segundo o informe Global Report on the Status of Women in the News Media, publicado pola International Women’s Media Foundation no 2014, case a metade das mulleres xornalistas enfrontáronse ao acoso sexual, e máis dunha quinta parte, á violencia física.
Esta realidade, que ás máis das veces se silencia e moi poucas se denuncia, non é máis do que a consecuencia no eido da comunicación da desigualdade de xénero e do sistema patriarcal imperantes na nosa sociedade. Os medios e o conxunto das e dos profesionais da comunicación teñen a obriga de loitar contra esta desigualdade, mellorando a visibilidade das mulleres, eliminando os estereotipos de xénero, utilizando unha linguaxe inclusiva e promovendo a igualdade nas estruturas dos propios medios. E, por suposto, condenando sen paliativos calquera tipo de agresión sexista. Porque o libre exercicio do xornalismo só pode existir nunha sociedade non sexista.
CPXG