O mural, cuxa realización se encadra na terceira edición do festival de arte urbano Culturban e nas celebracións do Día Internacional da Liberdade de Prensa o pasado 3 de maio, reivindica o exercicio do xornalismo a través das figuras femininas, que representan tanto o peso maioritario das mulleres dentro da profesión como a necesidade de multiplicar as voces femininas nas informacións e romper os teitos de cristal dentro das redaccións. Ao mesmo tempo, Xoana Almar homenaxea coa súa obra o o xornalismo local como un alicerce esencial para a liberdade de información, que garante os dereitos de toda a cidadanía. 

A obra está realizada sobre o muro circular dun dos edificios da antiga Frigsa, que alberga na actualidade a sede de Radio Taxi e a Unión de Radioaficionados de Lugo, no parque da Milagrosa. A súa presenza na cidade das murallas servirá como recordatorio do papel fundamental do xornalismo e da información na construción das sociedades democráticas, así como de estímulo para a consecución dunha profesión xornalística verdadeiramente igualitaria. O Colexio Profesional de Xornalistas de Galicia quere agradecer a disposición da artista, así como do Concello de Lugo, para poder levar ás rúas estas necesarias reivindicacións dunha maneira pública, fermosa e innovadora. 

Xoana Almar formouse como ilustradora, economista e antropóloga. Estudou en Granada e alí comezou a traballar no eido da pintura a partir do 2008. No 2013 volve a Galicia e constitúe xunto a Miguel Peralta e Raquel Doallo a cooperativa Cestola na Cachola, onde traballa como muralista, pintora e ilustradora. No seu traballo hai influencias de diferentes nomes da pintura galega, tanto clásicos como actuais. A través das súas personaxes, maioritariamente femininas, sobresae unha busca de formas sinxelas coas que tenta expresar unha personalidade ou historia de vida. 

CPXG