Iniciativas contra o ciberacoso e outras violencias de xénero contra as xornalistas
Varias asociacións catalás da comunicación xuntábanse esta semana para facer público un manifesto contra o ciberacoso ás mulleres xornalistas. De entre as moitas modalidades de ataques por razón de xénero que sofren as profesionais, que segundo os últimos datos aumentaron na postpandemia, a violencia en liña tense revelado como unha das máis preocupantes, e organismos como a Unesco publicaron recentemente recomendacións para combatela.
O pasado luns 22 de xaneiro presentábase no Palau del Parlament de Catalunya, en Barcelona, o manifesto Contra o ciberacoso ás mulleres xornalistas, no marco das xornadas Ciberacoso ás mulleres xornalistas, unha forma de violencia crecente. O texto reclama visibilizar que este tipo de acoso ten “un impacto psicolóxico nas profesionais” e que afecta severamente ás súas vidas "dentro e fora do traballo”. Para o combater, reclaman implicación de medios, institucións e actores políticos para frenar esta forma específica de violencia, mediante a creación "de ferramentas suficientes para protexer as xornalistas de todas as formas de acoso”. O documento está asinado polo Col·legi de Periodistes de Catalunya, a Associació de Periodistes Parlamentaris - Col·lectiu Ciutadella, o Sindicat de Periodistes de Catalunya, o Grup de Periodistes Ramon Barnils, #OnSónLesDones, a Associació de Dones Periodistes de Catalunya, a Xarxa Internacional de Dones Periodistes i Comunicadores - Xarxa Internacional de Periodistes amb Visió de Gènere e o Mestrado en Xénero e Comunicación da Universitat Autònoma de Barcelona.
O acoso online é unha das ameazas máis habituais ás que se enfrentan as xornalistas e vén sendo obxecto de constante preocupación na profesión. Recentemente, a UNESCO vén de publicar o documento Recomendacións de acción en resposta á violencia en liña contra as mulleres xornalistas, baseado nos resultados do proxecto de investigación The Chilling, posto en marcha pola UNESCO e o Centro Internacional de Xornalistas, baixo a dirección de Julie Posetti e Nabeelah Shabbir e con contribucións de 25 investigadores internacionais. O traballo alerta do "caracter endémico da violencia de xénero en liña contra as xornalistas" e fornecen de medidas concretas (dirixidas aos Estados, as organizacións de noticias, as empresas de Internet, a sociedade civil e os axentes xurídicos) para enfrontar efectivamente esta amenaza á liberdade de expresión, a seguranza das xornalistas e o acceso á información.
Esta non é nin moito menos a única violencia que enfrontan as mulleres xornalistas. Unha enquisa da FeSP, difundida a pasada semana pola Federación Europea de Xornalistas, revela como as súas condicións laborais e profesionais sufriron un grave deterioro na postpandemia. O 46,9% das enquisadas declarou ter experimentado algún tipo de acoso ou ataque por razón de xénero. De entre elas, un 32.4% declararon ter sido ameazadas ou insultadas en redes sociais e un 16.2% ter sido vítimas de ciberacoso. Pero aínda é maior a incidencia doutro tipo de violencias de xénero: un 48,5% declarou que recibiu insultos sexistas no traballo, un 35% dixo ter sido acosadas no lugar de traballo por seren mulleres e un 26,5% ter sufrido acoso sexual no seu entorno profesional.
CPXG