Continuando coa celebración do Ano das Letras de Begoña Caamaño, o Colexio Profesional de Xornalistas de Galicia organiza este sábado 25 de abril, baixo a denominación Poñer a voz, un encontro periodístico no que a biografía profesional desta xornalista e colexiada servirá de fío condutor para unha conversa interxeracional sobre o periodismo galego. O acto vai dar comezo ás 12:00 horas na Casa das Máquinas de Santiago de Compostela (Rúa de Galeras, s/n) e está organizado coa colaboración da Secretaría Xeral da Lingua da Xunta de Galicia. 

En homenaxe ao traballo xornalístico de Caamaño, especialmente vinculado á radio, a celebración vai tomar a forma dun programa de radio ao vivo, conducido por Mónica Rosas, membro da Xunta de Goberno do Colexio de Xornalistas e redactora dos Servizos Informativos da CSAG. Polos micrófonos do acto, pasarán periodistas que compartiron diferentes etapas profesionais con Begoña Caamaño, como Ana Romaní, María Xosé Porteiro e Pablo Lago, así como profesionais doutras xeracións como Sonia Díaz, de Agareso, Marga Tojo, de Xornalistas Galegas, e Lucía Junquera, directora do podcast do Colexio de Xornalistas sobre Begoña Caamaño, tamén titulado 'Poñer a voz'.

O encontro vai contar tamén con intervencións do público asistente, ademais da lectura de distintos textos da autoría de Begoña Caamaño e a actuación musical de Uxía. A asistencia ao acto é libre e gratuíta. 

Ademais, o Colexio de Xornalistas reivindica tamén a figura de Caamaño co podcast Poñer a voz, un relato sonoro en cinco capítulos de periodicidade semanal do que xa se publicaron os dous primeiros, dirixido por Lucía Junquera e realizado tamén co apoio da Secretaría Xeral da Lingua. Poñer a voz pode escoitarse a través de Ivoox, Spotify e Apple Podcast, ademais de na web de Xornalistas. Esta semana vén de publicarse o terceiro capítulo, "Unha radio para un país", que relata a chegada de Begoña Caamaño á Radio Galega en 1988, primeiro á a delegación de Vigo e catro anos máis tarde aos estudios centrais de San Marcos.

CPXG