La Plantación organiza o sábado 23 de abril o obradoiro desde Ucraína con Emilio Morenatti O oficio de mirar e o compromiso coa realidade. O taller desenvolverase de maneira virtual entre as 17.00 e as 21:15 horas, e ten prezo reducido para as colexiadas e os colexiados do CPXG.
O Centro UNED de Ourense organiza os días 11 e 12 de maio o Curso de Extensión Universitaria Nada é verdade nin é mentira? A verificación das noticias na era das fake news, que ten prezo reducido para as colexiadas e os colexiados do CPXG.
A Unesco difundiu O xornalismo é un ben común, o seu informe sobre as tendencias en liberdade de expresión e desenvolvemento dos medios, correspondente aos anos 2021 e 2022, no que se retrata un xornalismo que sae "debilitado" da situación de pandemia. A seguranza dos xornalistas, as liberdades de prensa e de información e a viabilidade económica dos medios son os tres retos principais para asegurar o futuro do xornalismo para a organización internacional.
A dirección da Radiotelevisión Española vén de asinar xunto aos sindicatos o seu II Plano de Igualdade, que ten como obxectivos principais garantir a igualdade de trato e oportunidades, promover a presenza equilibrada de mulleres nas áreas e os contidos e incorporar a perspectiva de xénero. O plano inclúe tamén un anexo dirixido á prevención do acoso sexual.
Ás 14:00 horas do vindeiro xoves de 7 abril, remata o prazo para que os colexiados e colexiadas do CPXG e as socias e socios do Club de Prensa de Ferrol poidan escoller a candidatura gañadora do XVIII Premio José Couso de Liberdade de Prensa. As candidaturas propostas para o premio nesta edición son Mònica Bernabé, Pablo González, Víctor Guerrero e Érika Reija. Accede co teu contrasinal e vota aquí.
O Colexio Profesional de Xornalistas de Galicia convoca, en colaboración con Gadis, a segunda edición do premio 'Somos Esenciais', que ten como obxecto recoñecer o traballo xornalístico máis salientábel sobre a Covid-19 en Galicia no ano 2021. O premio está dotado con 1.500 euros e un diploma acreditativo. O prazo de presentación de candidaturas estará aberto ata as 14.00 horas do xoves 19 de maio de 2022.
Unha sentenza do Tribunal de Xustiza da Unión Europea vén de considerar lícito revelar información privilexiada a determinadas persoas dentro dunha investigación xornalística, sempre que se faga con fins profesionais e de maneira proporcionada. A resolución refírese a dous artigos no Daily Mail sobre a compra de accións de dúas sociedades, da que se beneficiaron cidadáns británicos que foron contactados polo xornalista e mercaron accións antes da publicación da información.
A Deputación de Pontevedra abriu a convocatoria dun proceso selectivo polo sistema de oposición libre para a cobertura dunha praza de técnica ou técnico en ciencias da información, encadrada na escala de Administración especial, subescala técnica, clase superior e integrada no grupo A1.
A sétima bolsa ‘Nacho Mirás’ para xornalistas noveis, organizada e desenvolvida polo Colexio Profesional de Xornalistas de Galicia e patrocinada por Abanca, foi presentada esta mañá na Facultade de Ciencias da Comunicación da Universidade de Santiago de Compostela, que colabora coa iniciativa. A bolsa ten unha dotación de 6.000 euros, destinada a promover proxectos xornalísticos de novos e novas tituladas en Xornalismo ou Comunicación Audiovisual. A recepción de propostas está aberta até o 31 de maio de 2022.
Este xoves, 24 de marzo, preséntase a sétima edición da Bolsa ‘Nacho Mirás’ para xornalistas noveis, organizada polo Colexio Profesional de Xornalistas de Galicia e patrocinada por Abanca, coa colaboración da Facultade de Ciencias da Comunicación da Universidade de Santiago de Compostela. O acto terá lugar ás 11:00 horas na Aula 1 da Facultade de Ciencias da Comunicación da USC (Avda. de Castelao s/n), en Santiago de Compostela.