O IES de Melide recibiu esta mañá a visita de dous novos obradoiros contra a desinformación postos en marcha polo Colexio Profesional de Xornalistas de Galicia. A xornalista Sara Garea achegou á rapazada melidense as claves do espallamento das fake newss e ensinoulles ferramentas para aprender a combatela. Estes obradoiros de alfabetización mediática chegan aos centros de ensino medio da Coruña grazas a un convenio asinado coa Deputación da Coruña.

Esta mañá presentouse na Facultade de Ciencias da Comunicación da Universidade de Santiago de Compostela a décima edición da bolsa ‘Nacho Mirás’ para xornalistas noveis, organizada e desenvolvida polo Colexio Profesional de Xornalistas de Galicia e patrocinada por Abanca. A bolsa conta cunha dotación de 6.000 euros, destinada a promover proxectos xornalísticos de novos e novas tituladas en Xornalismo ou Comunicación Audiovisual, e conta coa colaboración da propia Facultade. A recepción de propostas está aberta até o 31 de xullo de 2025.

Este xoves 27 de marzo vai ter lugar a presentación da décima edición da Bolsa ‘Nacho Mirás’ para xornalistas noveis, organizada polo Colexio Profesional de Xornalistas de Galicia e patrocinada por Abanca, coa colaboración da Facultade de Ciencias da Comunicación da Universidade de Santiago de Compostela. O acto terá lugar ás 11:00 horas na Aula de Visionado 1 da Facultade de Ciencias da Comunicación da USC (Avda. de Castelao s/n), en Santiago de Compostela.

Os obradoiros contra a desinformación do Colexio Profesional de Xornalistas de Galicia chegaron hoxe ao IES de Curtis. As mozas e mozos curtenses recibiron esta mañá dous talleres deste programa de alfabetización mediática, impartidos por Elena Martín Lores. Estes obradoiros están a desenvolverse en centros de ensino medio da Coruña grazas a un convenio asinado coa Deputación da Coruña, a través da área de Dereitos Civís liderada pola deputada Soledad Agra.

A xornada O impacto da intelixencia artificial no xornalismo: Riscos e oportunidades xuntará na mañá do luns 7 de abril a expertos en IA como Ramón Salaverría ou Patricia Ventura na Facultade de Ciencias da Comunicación de Santiago de Compostela. O encontro está organizado polo Colexio Profesional de Xornalistas de Galicia, co patrocinio da Secretaría Xeral de Medios da Xunta de Galicia e a colaboración da Facultade e do Colexio Profesional de Enxeñería en Informática de Galicia. A xornada, libre e gratuíta, xa ten aberto o prazo de inscrición, complementarase posteriormente con webinars formativos.

Rematado o prazo de reclamacións, tal e como estipula o Regulamento das demarcacións, e ao non realizarse ningunha, a Xunta de Goberno do Colexio Profesional de Xornalistas de Galicia procede a proclamar como definitivas as candidaturas presentadas nas demarcacións de Pontevedra, Santiago e Vigo.

O Colexio Profesional de Xornalistas de Galicia convoca un ano máis, en colaboración con Gadis, o premio 'Somos Esenciais'. Nesta quinta edición, a organización eleva a dotación do premio até os 2.000 euros. Co lema A información ao servizo da xente, este galardón reforza a súa mensaxe cun seminario de xornalismo social que terá lugar a finais de ano. O prazo de presentación de propostas estará aberto ata as 14.00 horas do venres 30 de maio de 2025.

Onte, luns 17 de marzo, rematou o prazo para presentar candidaturas para as demarcacións de Pontevedra, Santiago e Vigo no Pleno Territorial do Colexio Profesional de Xornalistas de Galicia.

A decana do Colexio Profesional de Xornalistas de Galicia, Belén Regueira, e a deputada da Área de Dereitos Civís da Deputación da Coruña, Soledad Agra, presentaron hoxe o programa de obradoiros contra a desinformación con motivo da celebración do segundo dos talleres, impartido por Pedro Costa no IES Maximino Romero de Lema de Baio (Zas). Os obradoiros contra a desinformación son unha iniciativa de alfabetización mediática do Colexio de Xornalistas que continuará até o mes de maio nos centros de ensino medio da Coruña grazas a un convenio asinado coa Deputación da Coruña, a través da área de Dereitos Civís.

O vindeiro luns, 17 de marzo, remata o prazo para presentar candidaturas ás eleccións a representantes das demarcacións de  Pontevedra, Santiago e Vigo no Pleno Territorial. O martes 18 de marzo faranse públicas na web oficial do Colexio as candidaturas recibidas.