O 4 de xaneiro de 1882, nun modesto piso da rúa San Andrés da Coruña, nacía La Voz de Galicia. O periódico fundado por Juan Fernández Latorre celebra os 125 anos deste fito cun programa de actividades sociais e editoriais que comezarán mañá e no que destaca a inauguración dunha rúa no centro da Coruña que levará o nome do presidente e editor de La Voz de Galicia, Santiago Rey Fernández-Latorre.

O ministro de Comunicación e Información de Venezuela, Willian Lara, ratificou que a decisión de non renovar a concesión a RCTV de Caracas "é un feito irreversible cuxo fundamento constitucional, legal e regulamentario é solidamente incontrovertible", en resposta ó desexo do cardeal Jorge Urosa de reexaminar esa medida.

O próximo Cumio de Xefes de Estado do Mercosur, que se realizará en Brasil a mediados de xaneiro, haberá de alumar o camiño para o nacemento da nova irmá radial de TeleSur: RadioSur. O goberno venezolano levará ó próximo Cumio de Xefes de Estado do Mercado Común do Sur (Mercosur) a proposta formal de crear unha multiestatal radiofónica, RadioSur.

Os traballadores do diario de esquerdas francés 'Libération' deron luz verde ó cambio de estatuto da sociedade, unha condición sine qua non formulada polo primeiro accionista, Edouard de Rothschild, no seu proxecto de salvamento.

O Colexio Profesional de Xornalistas de Galicia (CPXG) conta cuns novos estatutos que foron aprobados na última Asemblea Xeral. Estes tiveron que ser modificados e adaptados para seren compatíbeis coa nova lei de colexios profesionais. A proposta foi aprobada o 16 de decembro, na Asemblea Xeral Ordinaria, que se celebrou na Coruña.

Un estudo revela que unha media de 32,3 millóns de españois contactaron coa televisión a diario durante o ano pasado 2006, cun medio de consumo entre este colectivo de persoas, de 279 minutos. Os datos foron facilitados por Barlovento Comunicación.

A Corporación RTVE aprobou unha ampliación de capital por valor de 1.510 millóns de euros, mediante a emisión de 302 millóns de accións cun valor nominal de cinco euros, segundo informou a Sociedade Estatal de Participacións Industriais (SEPI). Como resultado desta ampliación de capital, a Xunta Xeral da Corporación aprobou tamén modificar os seus estatutos. As accións serán subscritas polo ente público, que desembolsará integramente o seu importe a través da achega dos seus activos e pasivos por igual contía.

O xornalista gráfico Jaime Razuri, profesional peruano de 50 anos que traballa para a Axencia France-Presse, foi secuestrado en Gaza por cinco encapuchados, e de momento descoñécese o seu paradoiro, segundo fontes da seguridade palestina.

Un antigo membro das Forzas Armadas Revolucionarias de Colombia (FARC) condenado a 12 anos de cárcere, que testemuñara contra o xornalista Freddy Muñoz, inculpado e detido previtivamente desde o 19 de novembro de 2006 por "rebelión e terrorismo", finalmente declarou que non o coñece.

Reporteiros sen Fronteiras condena o peche da oficina da televisión privada por satélite Al-Charkiya en Bagdade, acusada de "incitación á violencia confesional" por ter mostrado imaxes de iraquís entristecidos pola morte do ex presidente Saddam Hussein. O anuncio da súa execución e a emisión das imaxes do aforcamento suscitaron moita controversia nos medios de comunicación iraquís. Algúns deles, e especialmente os órganos de prensa públicos, celebran a morte do "tirano", mentres que outros lamentan a morte do antigo presidente.