Máis de cinco anos despois dos ataques terroristas en Estados Unidos en setembro de 2001, as respostas mundiais ó terrorismo contribuíron a formar unha gama de ameazas á liberdade de expresión e o perigo é "real, catastrófico e estase a acelerar", advertiu Human Rights Watch (HRW) no seu Informe Mundial 2007.

O xornalista Fran Llorente foi ratificado como director dos Servizos Informativos de Televisión Española, cargo que ocupa desde maio de 2004, cando foi nomeado pola ex directora xeral Carmen Caffarel. Neste período, Llorente estivo á fronte dun equipo que tentou distanciarse da etapa anterior. Durante a xestión do seu predecesor (Alfredo Urdaci), a televisión pública foi condenada por "manipulación" pola Audiencia Nacional.

A Comisión de Seguimento do Código Deontolóxico da Publicidade Infantil anunciou onte que, tras a análise de 200 anuncios infantís da campaña navideña 2006-2007 só se presentaron ante a Comisión 25 casos de posible incumprimento da lexislación ou do Código, sen que fose necesario presentar denuncias ante a Secretaría de Estado de Telecomunicacións e a Sociedade da Información (SETSI) ou reclamacións ante a asociación Autocontrol.

O embaixador de EEUU en México, Antonio Garza, urxiu onte ó Goberno mexicano para que presente á xustiza ós asasinos do operador de TV estadounidense Will Bradley, morto nunha manifestación en Oaxaca. "A investigación sobre a morte de Bradley aínda non redundou en ningún arresto ou xuízo, e seguimos profundamente preocupados pola falta de progreso na investigación", indicou o diplomático nun comunicado.

O Tribunal Constitucional (TC) levantou a suspensión á maioría do articulado da Lei da Comunicación de Catalunya. Este tribunal só mantén a suspensión do art. 56, que fai referencia á "intransmisibilidade das licenzas", e á disposición transitoria segunda que se refire "ó réxime de concesión de licenzas".

A Plataforma pola Recepção das Televisões Portuguesas na Galiza bota a andar unha campaña para normalizar a recepción do sinal das televisións portuguesas en Galiza. Esta petición xa chegou ao Consello de Europa, que esixe o cumprimento do artigo 11.2 da Carta Europea das Linguas Minoritarias: "as partes comprométense a garantir a liberdade de recepción directa das emisións de radio e televisión dos países veciños nunha lingua utilizada baixo unha forma idéntica ou próxima dunha lingua rexional ou minoritaria, e a non oporse á retransmisión de emisión de radio e de televisión dos países veciños nesa lingua".

Os diarios de información xeral máis mercados en España conseguiron un total de 1.309.699 vendas diarias durante o mes pasado de novembro, un 4,8% menos que o ano anterior, segundo se desprende do estudo da Asociación Española de Editores de Diarios (AEDE), auditado por Deloitte, e que ten en conta tamén as subscricións individuais. Tal e como ocorreu en outubro do 2006, en novembro El Mundo volve a situarse como o diario que máis aumento rexistrou, un 5,91%, ó conseguir 247.540 vendas diarias. De todas as formas, unha vez máis foi El País o que se colocou como o periódico con maior número de exemplares diarios, 334.042, pese a rexistrar unha baixada dun 6,77%.

O maior accionista do grupo estadounidense Tribune Co. presentou unha oferta para mercar a empresa e escindir algúns dos seus negocios de radio, televisión e entretemento, nunha proposta que fixa o prezo da compañía en 7.600 millóns de dólares.

Reporteiros sen Fronteiras séntese consternada ó coñecer a demisión, o 18 de xaneiro de 2007, de Aboubakr Jamai, director de publicación de Le Journal Hebdomadaire; unha decisión que adoptou obrigado, e que vén a confirmar o notable estrago que existe na liberdade de prensa en Marrocos.

Cando transcorreu menos dun mes desde que o Consello de Seguridade de Nacións Unidas adoptase, o 23 de decembro de 2006, a resolución 1738 sobre a protección dos xornalistas en conflitos armados, outra serie de asasinatos vén a lembrar a urxencia dun auténtico compromiso por parte do Estado iraquí. Desde marzo de 2003 mataron no país a 146 xornalistas e colaboradores de medios de comunicación.