As dúas sesións formativas serviron para achegar ás e aos profesionais coñecementos e técnicas prácticas, ao tempo que se resolveron dúbidas e se formularon reflexións sobre unha materia informativa que se estendeu nos últimos tempos a tódalas seccións, da Política ao Deporte ou á Economía. Algúns dos puntos tratados foron a diversificación das fontes (con ideas para evitar o abuso de fontes veciñais ou familiares), a contextualización (cunha explicación de por que a violencia de xénero é un problema estrutural e require un tratamento diferenciado con respecto a outros crimes) ou a necesidade de construir un relato xornalístico dos feitos que non caia na culpabilización da vitima e evite a revitimización. 

Carmen Quintela, xornalista santiaguesa, viviu en Cidade de Guatemala máis de dez anos, onde se especializou na cobertura e investigación con enfoque de xénero. Actualmente traballa a distancia como coordinadora editorial da Agencia Ocote, medio guatemalteco especializado en temas de xénero, medioambiente, memoria histórica e verificación; e colabora tamén en medios como elDiario.es. O seu traballo foi recoñecido en dúas ocasións co premio nacional de xornalismo de Guatemala e nunha co premio da Iniciativa para o Xornalismo de Investigación nas Américas do ICFJ. Coordinou editorialmente «No fue el fuego», un especial xornalístico galardoado co Premio Gabo 2022 na categoría de cobertura e cun premio no festival FINOFF 2022, onde recibiu a mención especial pola cobertura de dereitos humanos.

Marga Tojo, especializada en políticas sociais e desigualdade, forma parte da directiva de Xornalistas Galegas, colectivo na defensa dun xornalismo con perspectiva feminista. As súas colaboracións pasan por medios como Público, eldiario.es, Nós Diario ou a Radio Galega, Realiza un master en estudos de xénero e xestión de políticas da igualdade. Ademais de xornalismo, fai novela, ensaio e poesía, e acaba de gañar o premio Selic de narrativa coa novela negra Sarela, un ensaio de xénero novelado en forma de thriller. Desenvolve investigación e divulgación sobre análise crítica do discurso contemporáneo e programación e xestión de contidos, eventos e proxectos culturais. Co Colexio de Xornalistas ten impartido formación en desinformación e alfabetización mediática.

Con estes obradoiros chega a unha nova fase o programa de formación para xornalistas en materia de igualdade e prevención das violencias machistas iniciado polo Colexio Profesional de Xornalistas de Galicia en 2021.  A loita contra a desigualdade e a violencia de xénero é unha das principais preocupacións do Colexio, á que ten dedicado numerosos esforzos desde a sinatura, hai máis de vinte anos, da Declaración de Compostela. A formación nesta materia chega agora ás redaccións tras a sinatura dun convenio coa Consellería de Politica Social e Igualdade, no marco do Pacto de Estado contra a Violencia de Xénero, co que se dá cumprimento ao o artigo 58 da a Lei 7/2023, do 30 de novembro, para a igualdade efectiva de mulleres e homes de Galicia, que recolle que se organizarán "actividades formativas dirixidas a profesionais da información coa finalidade de adquiriren as habilidades e os coñecementos necesarios para, no exercicio da súa profesión, transmitiren unha imaxe igualitaria, plural e non estereotipada de mulleres e homes".

CPXG