A Xunta de Goberno do Colexio Profesional de Xornalistas de Galicia (CPXG) quere expresar publicamente o seu profundo malestar por todo o que veu ocurrindo cos xornalistas e outros profesionais de ANTENA 3-TELEVISIÓN sometidos -en número de 254 fixos e outros tantos temporais- a un Expediente de Regulación de Emprego (ERE) e abocados a teren que abandonar os seus postos de traballo. Un longo proceso de negociacións, e de mobilizacións e protestas, non ten servido, lamentablemente, para reconducir e racionalizar unha situación que, polo que atinxe a Galicia, determinou xa o peche dos centros de traballo de A Coruña e Vigo e deixará a Delegación de Santiago de Compostela cunha plantilla reducida a pouco menos da metade.

A Xunta de Goberno do Colexio Profesional de Xornalistas de Galicia (CPXG) considera imprescindible que o Goberno español insista en reclamar das autoridades estadounidenses unha investigación sobre as circunstancias da morte do compañeiro galego José Couso Permuy, operador de cámara de Tele 5, tiroteado por un tanque do Exército de EE UU cando tomaba imaxes desde unha habitación do hotel Palestina de Bagdad. Este Colexio entende que o Executivo de José María Aznar ten a obriga política e moral de facer todo o posible para que se clarexe a morte dun cidadán español, desarmado e indefenso, en circunstancias o suficientemente confusas como para requerir unha explicación a fondo. Por iso facemos tamén un chamamento ás institucións galegas para que se pronuncien neste sentido e utilicen a súa influencia ante o Goberno Español a fin de impedir que a verdade do ocorrido se agoche baixo o manto dos segredos de guerra.

A Xunta de Goberno do Colexio Profesional de Xornalistas de Galicia (CPXG), logo da morte de 12 profesionais da información a consecuencia dos bombardeos anglo-norteamericanos sobre Bagdad, fai pública a seguinte nota:

En momentos marcados pola ameazadora sombra das bombas e os intensos e prolongados preparativos para a guerra -chamada "preventiva" contra Iraq- impulsados polos gobernantes de Estados Unidos, Reino Unido e España, á marxe do Consello de Seguridade das Nacións Unidas, a Xunta de Goberno do Colexio Profesional de Xornalistas de Galicia (CPXG) considera o seu deber subliñar o seguinte: