O 11 de setembro de 2015, recibiuse no Colexio Profesional de Xornalistas de Galicia, por correo electrónico, un escrito remitido pola Asemblea Cidadá de Carral no que denunciaba o tratamento informativo que a prensa, sobretodo a escrita, realizou do accidente do rally en Carral o 5 de setembro. Ante esta denuncia, o Colexio de Xornalistas iniciou a súas pesquisas para realizar un seguemento informativo da nova e ver en que medida sobrepasaba a ética da profesión.

O Informe sobre o tratamento do accidente do Rally da Coruña en Carral, que recolle as conclusións deste seguemento, detecta algún problemas no tratamento desta noticia, como a inclusión dun vídeo do accidente, sen editar, gravado cun móbil por unha testemuña e de imaxes sacadas das redes; a publicación de datos irrelevantes e que afectan á intimidade das vítimas, mesmo de menores; a identificación do piloto e do copiloto con nome completo, datos persoais e fotografía; ou o uso dunha linguaxe morbosa e especularizadora.

Por todo isto, o Colexio Profesional de Xornalistas manifesta que "en xeral o tratamento informativo puido realizarse de forma máis coidadosa evitando certas imaxes e comentarios que puideron ferir a sensibilidade dos afectados e da súas familias" e lembra aos medios a necesidade á hora de elaborar unha nova destas características, ter en conta tanto o Código Deontolóxico do Xornalismo Galego como o Decálogo de recomendacións para o tratamento de sucesos de catástrofes.

CPXG

Foto: Rally Botafumeiro do 2011 - Jorjum (CC BY-SA 3.0)