A Asemblea Anual do Comité Directivo da Federación Europea de Periodistas (FEP), celebrada o pasado 18 e 19 de maio en Bucarest, adoptou a resolución “Alarma polos riscos para a liberdade de expresión en España”. Nesta resolución, realizada a partir dun informe sobre a situación da liberdade de expresión presentado pola Federación de Sindicatos de Xornalistas (FeSP), a FEP lembra ao Goberno Español que as coñecidas como 'Leis Mordaza' "reducen as liberdades de información e expresión especialmente dos xornalistas, pero alcanzan a todos os cidadáns” .

A organización internacional considera que a existencia deste tipo de leis desde o 2015 provocou “multas a xornalistas que exercen a cobertura de feitos, sobre todo por rexistraren a actuación dalgúns policías en manifestacións e desaloxos de domicilios” e recolle casos recentes como os do fotógrafo Axier López, a blogueira Cassandra Vera ou a entrada da policía ao xornal Público. En opinión da FEP, "estes e outros casos similares vulneran os tratados internacionais sobre liberdade de expresión asinados por España.

Por estas razóns, a Asemblea Anual da FEP lembra ao Goberno español na súa resolución "que a loita contra o terrorismo non pode servir de excusa para a supresión das liberdades de expresión e información". Así mesmo, "fai un chamamento ao Parlamento español para que revise e reforme as leis devanditas en liña coa lexislación sobre liberdade da prensa e liberdade de expresión da Unión Europea.”

CPXG